Këtë të shtunë dt. 03.06.2023 Agjencia Kadastrale e Kosovës ka mbajtur trajnim për të gjithë noterët e Republikës së Kosovës. Qëllimi i këtij trajnimi ishte njoftimi nga afër me hapat që noterët duhet të ndjekin në Sistemin e shërbimeve digjitale të AKK-së, për regjistrimin e shënimit për njësitë kadastrale që do të jenë objekt i akteve noteriale.
Vendosja e këtij shënimi në regjistrin e të drejtave pronësore do të ngrisë nivelin e sigurisë së transaksioneve dhe do të ndihmojë në parandalimin e krijimit të dy ose më tepër akteve noteriale për njësitë e njejta kadastrale.
Një zhvillim i tillë është mundësuar edhe për Përmbaruesit privat, të cilët do të trajnohen nga AKK në javët në vazhdim.
Meqë fokusi i AKK-së do të jetë digjitalizimi i shërbimeve kadastrale, noterët poashtu u njoftuan edhe me angazhimin e institucionit tonë për të zhvilluar modulin e ri nëpërmjet të cilit regjistrimi i të drejtave pronësore në regjistër do të bëhet nga ana e noterëve.
Në këtë takim u diskutuan edhe çështje të tjera nga praktikat e noterëve që lidhen me shërbimet kadastrale.