Dje me datë 19 tetor 2023, ka vazhduar punimet e sesionit vjeshtor Komiteti për Administrimin e Tokës dhe Infrastrukturën Kombëtare për Informacion Hapësinor në Republikën e Kosovës.
Në hapje të punimeve të radhës së Komitetit, në fjalën e tij hyrëse zëvendësministri i Infrastrukturës, z. Hysen Durmishi tha që administrimi i tokës dhe politikat lidhur me tokën janë thelbësore për qeverisje të mirë, rritje të qëndrueshmërisë ekonomike, për siguri, ngritje të mirëqenies sociale, dhe ofrimin e mundësive ekonomike të hapura për të gjithë qytetarët e Republikës së Kosovës. Në kuadër të Komitetit, do të përkujdesemi që të shtjellojmë të gjitha temat e administrimit të tokës, të cilat janë në interes të institucioneve dhe të qytetarëve” tha zëvendësministri Durmishi.
Zv. Drejtori i Përgjithshëm i Agjencisë Kadastrale të Kosovës, z. Avni Ahmeti, në fjalën e tij përmendi para të pranishmëve të arriturat e Agjencisë Kadastrale të Kosovës, dhe zhvillimet që e karakterizuan këtë periudhë kohore që nga mbajtja e takimit të parë të komitetit në qershor të këtij viti.
Z.Ahmeti tha që Agjencia Kadastrale e Kosovës ka hartuar pesë UA për implementimin e Ligjit për IKIH, është hartuar Strategjia e re Kombëtare për Informacion Hapësinor, e cila pritet të aprovohet deri në fund të këtij viti. Gjithashtu është miratuar nga Qeveria, Projektligji për Kadastër dhe është në procedurë të aprovimit nga Kuvendi i Republikës së Kosovës. Paralelisht janë duke u finalizuar UA për Ligjin për Kadastër, dhe planifikohet të hartohet një plan i veprimit dhe strategji për realizimin e suksesshëm të vertikalizimit të kadastrit në Kosovë. Janë në proces të realizimit shumë projekte të rëndësishme, të cilat janë në interes të institucioneve dhe qytetarëve, përfshirë këtu: Aerofotografimin e territorit të Republikës së Kosovës, Sistemin e adresave, Rrjetin referent të lartësive, dhe shumë shpejtë do të fillojmë edhe me projekte tjera të rëndësishme si Korrektimi i të dhënave kadastrale, Avancimi i sistemeve kadastrale, dhe Zhvillimi i Gjeoportalit.
Anëtarët e Komitetit, dhe të pranishmit e tjerë vazhduan punimet duke aprovuar projekt rregulloren e punës së Komitetit dhe procesverbalin nga mbledhja e kaluar. Në fund të Komitetit u nxjerrën edhe disa reomandime për aktivitetet e radhës në këtë fushë. Në takim të pranishëm ishin edhe përfaqësues të Bankës Botërore, USAID - Aktiviteti i Qeverisjes së Pronës, përfaqësues nga Un Habitat dhe përfaqësues nga Kadastri holandez.
Komiteti Ndërministror për Administrimin e Tokës, dhe Infrastrukturën Kombëtare për Informacionin Hapësinor në Republikën e Kosovës, do të vazhdoi aktivitetet të cilat do të prezantohen në takimin e radhës të punimeve të Komitetit, i planifikuar të mbahet në Maj 2024.