Kohë më parë Agjencia Kadastrale e Kosovës kishte marrë vendim për hapjen e pjesshme të regjistrave të saj për institucione të interesit, ndërsa shumë nga këto institucione pasi që i janë nënshtruar trajnimit nga ekspertë të AKK-së kanë filluar të i qasen regjistrave për nevoja të punëve të tyre të përditshme.
Në shtator 2022 në ambientet e AKK-së është mbajtur trajnimi i zyrtarëve të Agjencisë për Parandalimin e Korrupsionit për qasje të kufizuar në Regjistrin e të Drejtave mbi Pronën e Paluajtshme. Trajnimit iu nënshtruan disa zyrtarë të Agjencisë për Parandalimin e Korrupsionit ndërsa përgatitja e tyre do të mundësojë shfrytëzimin e informacioneve kadastrale në kohë reale dhe përmes ueb shërbimeve. Nevoja për këtë trajnim vije edhe si rezultat i avancimeve teknologjike dhe ligjore të Agjencisë Kadastrale të Kosovës në fushën e hapjes së të dhënave dhe shkëmbimit të tyre në kohë reale me institucione publike të interesit. Kjo mënyrë e funksionimit do të avancojë kualitetin e shërbimeve që institucione të ndryshme u ofrojnë qytetarëve dhe institucioneve të Republikës së Kosovës.
Në takimin e fundit të mbajtur në AKK u diskutua në lidhje me mundësinë e verifikimit të pronarëve që tashmë janë verifikuar më herët me kërkesa fizike në AKK. Për të thjeshtuar dhe shpejtuar verifikimin palët u dakorduan për zhvillime të reja në sistemet digjitale për të mundësuar komunikim nëpërmjet ueb shërbimeve.
Meqë fokusi i Agjencisë Kadastrale të Kosovës është digjitalizimi i shërbimeve kadastrale, ky institucion po vazhdon takime me palë të ndryshme të interesit për të mundësuar ofrimin e shërbimeve sa me të lehta e më të shpejta në të dhëna kadastrale.