Në Sevilla të Spanjës 115 delegatë nga 37 vende dhe 10 organizata të ftuara po marrin pjesë në aktivitetin dy ditor të organizuar nga Instituti Kombëtar Gjeografik i Spanjës dhe i mbështetur nga Drejtoria e Përgjithshme e Kadastrës. Pjesë e punimeve është edhe një delegacion i Agjencisë Kadastrale të Kosovës i udhëhequr nga zv. Drejtori Ekzekutiv z. Avni Ahmeti.
Në këtë konferencë po adresohen sfidat globale për të dhënat gjeohapësinore, me fokus e ardhmja e të dhënave gjeohapsinore, rëndësia e tyre për reagim në katastrofa natyrore e gjithashtu edhe në implementimin e politikave klimatike. Sipas Colin Bray, President i EuroGeographics: “Sevilla u emërua Kryeqyteti Evropian i Turizmit të zgjuar në 2023 në njohjen e lidershipit të saj në inovacionin e gjelbër, lëvizshmërinë e zgjuar dhe udhëtimin e qëndrueshëm. Prandaj ky vend u zgjodh për diskutimet mbi adresimin e sfidave globale me të dhëna zyrtare gjeohapësinore.”
Edhe kjo pjesëmarrje e AKK-së në organizime të tilla të nivelit evropian dëshmon përkushtimin e institucionit për të qenë në hap me kohën sa i përket ndryshimeve dhe avancimeve të nevojshme në fushën e të dhënave kadastrale dhe gjeohapsinore, vlerën e lartë të këtyre të dhënave si dhe ofrimin e informacioneve të sakta për të gjetur zgjidhje për sfida globale.
Kujtojmë që Agjencia Kadastrale e Kosovës që nga viti 2003 është anëtare e EuroGeographics, e cila është organizatë ndërkombëtare që përfaqëson Autoritetet Shtetërore për Kadastër dhe Regjistrim të Pronës të shteteve të Evropës.