Zv. Drejtori Ekzekutiv i Agjencisë Kadastrale të Kosovës, z. Avni Ahmeti ishte për vizitë në Komunën e Novobërdës, ku u prit nga Kryetari i kësaj komune, z. Sasha Millosheviq dhe nënkryetari i saj, z. Bajrush Ymeri.
Arsyeja kryesore e kësaj vizite ishte informimi i udhëheqësisë së kësaj komune në detaje për procedurat dhe fazat e realizimit të projektit për emërtimin e rrugëve dhe vendosjen e tabelave të emrave të rrugëve dhe numrave të hyrjeve, përfshirë standardet dhe kërkesat teknike për vendosjen e tyre. Ky projekt është një hap i rëndësishëm për organizimin dhe identifikimin e adresave në nivel lokal dhe do të kontribuojë në përmirësimin e shërbimeve publike dhe administratës komunale.
Në përfundim të vizitës, Drejtori Ahmeti ofroi një pasqyrë të hollësishme mbi aktivitetet dhe projektet e tjera të Agjencisë Kadastrale të Kosovës. Ai theksoi rëndësinë e projekteve të Rindërtimit të Kadastrit, përmirësimin e Sistemit të Adresave dhe Avancimin e sistemeve kadastrale. Z. Ahmeti kërkoi angazhimin dhe bashkëpunimin e plotë nga ana e nivelit lokal për të maksimizuar përfitimet nga këto projekte, duke theksuar se një koordinim i ngushtë do të ndihmojë në arritjen e rezultateve më të mira për qytetarët dhe përmbushjen e objektivave të përbashkëta.
Nga ana tjetër, Kryetari i Komunës, z. Sasha Millosheviq, premtoi mbështetje dhe bashkëpunim në të gjitha aktivitetet e AKK-së.