Zv. Drejtori i Drejtoratit të RDPP-së, Hasim Pacolli së bashku me ekspertë nga Agjencia Kadastrale e Kosovës pritën në takim përfaqësuesit e Planifikimit Aeronautik nga kompania “BSF Swissphoto AG”. Tema kryesore e diskutimit ishte ecuria e projektit “Aerofotografimi i territorit të Republikës së Kosovës”, ku u prezantua një përmbledhje e fazave të rilevimit dhe procesimit të të dhënave të realizuara deri më tani. Drejtori Pacolli kërkoi vazhdimin e angazhimit maksimal nga kompania “BSF Swissphoto AG” për të siguruar përfundimin e suksesshëm të projektit, i cili sipas planit dinamik parasheh që në fund të këtij viti të dorëzohet produkti final. Mes tjerash u diskutua edhe për rëndësinë e fuqizimit të kapaciteteve të burimeve njerëzore të AKK-së, me fokus në zhvillimin profesional të stafit, duke ofruar trajnime të specializuara në fushën e Fotogrametrisë dhe fushave të tjera përkatëse, me qëllim rritjen e kapaciteteve teknike dhe profesionale.