03/10/2024
Agjencia Kadastrale e Kosovës, në bashkëpunim me Agjencinë e Regjistrimit Civil, ka filluar realizimin e projektit tejet të rëndësishëm, që ka të bëjë me ndërlidhjen e qytetarit me adresë zyrtare, i cili projekt ka ndikim të drejtpërdrejt në jetën e çdo qytetari të Kosovës.
Përmes implementimit të këtij projekti, parashihet që gjatë 12 muajve të ardhshëm, pranë zyrave të Gjendjes Civile, 55 konsulentë do të ofrojnë asistencë të drejtpërdrejtë për të gjithë qytetarët që
dëshirojnë të pajisen me "Formularin për Identifikimin e Adresës". Konsulentët do të ndihmojnë qytetarët në çdo hap të procesit, rrjedhimisht duke i udhëzuar në plotësimin e formularëve dhe duke siguruar që ata të kuptojnë rëndësinë e regjistrimit të adresës së tyre zyrtare dhe unike.
Për këtë qëllim gjatë kësaj jave, u zhvilluan trajnime intensive në zyrat e Agjencisë Kadastrale të Kosovës për konsulentët e angazhuar, të cilët do të shërbejnë sipas komunave dhe zyrtarëve të urbanizmit. Këto trajnime janë hapa të domosdoshëm, për të garantuar që konsulentët të jenë të pajisur me njohuritë dhe aftësitë e nevojshme për të ofruar shërbime sa më cilësore për të gjithë qytetarët.
Tashmë konsiderojmë se po përmbushim një nga obligimet tona kryesore ndaj qytetarëve, duke siguruar që çdo individ të ketë akses në informacionet e nevojshme dhe mbështetje të plotë gjatë procesit të ndërlidhjes së qytetarit me adresë zyrtare.