Me qëllim të koordinimit, thellimit të bashkëpunimit dhe zgjerimit të mëtutjeshëm të komunikimit ndërmjet nivelit qëndror dhe atij lokal, u zhvillua takimi i shtatë i rregullt me Kryetarët e Komunave të Kosovës, ku bashkë me Kryeministrin e Republikës së Kosovës, Albin Kurti, morën pjesë Ministri i Administrimit të Pushtetit Lokal, Elbert Krasniqi, Ministri i Financave, Punës dhe Transfereve, Hekuran Murati, si dhe Drejtori Ekzekutiv i Agjencisë Kadastrale të Kosovës, Avni Ahmeti.

Gjatë këtij takimi, Drejtori i AKK-së Avni Ahmeti, theksoi disa prej reformave kryesore në kadastër, përfshirë këtu Ligjin për Kadastër të Pronës së Paluajtshme, njëherit organizimin vertikal, ku theksoi rëndësinë e shqyrtimit të kërkesës për plotësim/ndryshimin e Ligjit për Administrimin e Pushtetit Lokal. Ai njoftoi për arritjet e fundme të  Agjencisë, në veçanti për matjen e rreth 797,165 metrave rrugë, si dhe digjitalizimin e rreth 70,000 adresave të reja, duke theksuar se tani janë në procesin e plotësimit të adresave të tjera në komunat e mbetura.

Ahmeti shprehu rëndësinë e projektit për ndërlidhjen e qytetarëve me adresë zyrtare, i cili do të ofrojë shërbime shumë më efikase dhe do të reduktojë problemet ekzistuese. Ai uroi qytetarët dhe komunat për këtë iniciativë dhe theksoi rolin e komunave në mirëmbajtjen e sistemit të adresave, me ç'rast theksoi se tani jemi në proces të kompletimit të adresave me tabela të emërtimeve të rrugëve dhe numrave të adresave në komunat e mbetura.

"Procesi i ndërlidhjes së qytetarit me adresë është shumë i rëndësishëm, ku përmes këtij procesi, qytetarët pajisen me adresë zyrtare dhe unike, e më pas do të pasoj me ofrimin e shërbimeve më kualitative dhe më të shpejta për qytetarët, rrjedhimisht duke evituar shumë probleme që janë shfaqur deri më tani. Qëllimi kryesor i të gjitha aktiviteteve dhe mbështetjes për komuna sa i përket kompletimit të adresave, duke përfshirë edhe këtë projekt, ka të bëjë me pajisjen e qytetarëve me adresë unike dhe zyrtare.", theksoi mes tjerash drejtori Avni Ahmeti.

Ndërsa Kryeministri Kurti theksoi: "Një çështje për të cilën i gëzohemi, është projekti "Ndërlidhja e qytetarit me adresë zyrtare". Ky projekt synon përmirësimin e administratës publike dhe shërbimeve për qytetarët, duke krijuar adresa unike dhe zyrtare. Kjo do të lehtësojë proceset e regjistrimit të adresave, do të rrisë sigurinë dhe do të ndihmojë planifikimin e qëndrueshëm të komunave. Me këtë sistem, qytetarët nuk do të kenë më nevojë për dokumente shtesë për regjistrim, fatura, por do të mund të deklarojnë adresën vetëm me emërtimet zyrtare të rrugëve, duke bërë administratën më të organizuar e gjithsesi edhe më efikase."