Agjencia Kadastrale e Kosovës (AKK) përmbylli sot me sukses takimin informues dhe koordinues për komunat e mbetura. Drejtori Ekzekutiv i AKK-së, në fjalën hyrëse, u uroi mirëseardhje të pranishmëve dhe theksoi rëndësinë e takimeve të rregullta me ZKK-të, me ç'rast nënvizoi rëndësinë e këtij takimi dhe të komunikimeve të rregullta me ZKK-të, në kuadër të përmirësimit të ofrimit të shërbimeve sa më cilësore për qytetarë.
Drejtori Ahmeti potencoi arritjet e AKK-së këtë vit në shumë prej projekteve kapitale dhe reformave legjislative, e po ashtu theksoi sugjerimet e ZKK-ve, por në veçanti shprehu rreth domosdoshmërisë për ofrim më të lartë të cilësisë në të gjitha ZKK-të. Ai vuri në dukje se ndryshimet në Ligjin për Administrimin e Pushtetit Lokal dhe ligjin e ri për kadastër do të ndihmojnë në krijimin e një sistemi më të qëndrueshëm dhe të mirëorganizuar, ku me implementimi i ligjit të ri për kadastrën, do të funksionalizohet tërësisht ligji i ri për kadastër.
Gjatë dy sesioneve së Takimeve Informuese dhe Koordinuese me ZKK-të, Agjencia Kadastrale e Kosovës (AKK) prezantoi projektet, aktivitetet kryesore dhe udhëzuesin e punës, me fokus në përmirësimin e shërbimeve elektronike për qytetarët, si një prioritet kyç i AKK-së.
Ndër pikat kryesore ishte zhvillimi i moduleve për palët e jashtme, të cilat mundësojnë dërgimin dhe marrjen e të dhënave në formë digjitale, duke lehtësuar procedurat dhe përmirësuar aksesin; avancimi i sistemeve për të përballuar kërkesat në rritje dhe për të përshpejtuar shërbimet kadastrale; përshtatja me kërkesat e reja ligjore, për t’iu përgjigjur ndryshimeve në legjislacion dhe për të dinamizuar proceset kadastrale; dhe zvogëlimi i barrës administrative për qytetarët, me një sistem të hapur dhe të ndërlidhur që rrit cilësinë e të dhënave dhe përmirëson qasjen.
Përmes shqyrtimit të ankesave, janë identifikuar problematika të ZKK-ve, duke sjellë rekomandime për përmirësim, rritjen e cilësisë së shërbimeve dhe sigurimin e një trajtimi më të drejtë e transparent për qytetarët. Këto përpjekje synojnë të lehtësojnë bashkëpunimin institucional dhe të ofrojnë shërbime më të mira dhe të qëndrueshme.
Si përfundim, angazhimet e AKK-së dhe bashkëpunimi me ZKK-të, mbeten një hap i rëndësishëm drejt përmirësimit të shërbimeve për qytetarët. Këto zhvillime jo vetëm që përshpejtojnë dhe thjeshtojnë procedurat, por gjithashtu krijojnë një mjedis më të hapur, transparent dhe më të besueshëm për të gjithë qytetarët e Kosovës.