Drejtori i Agjencisë Kadastrale të Kosovës, z. Avni Ahmeti, dhe Drejtori i Kompanisë Sigal Uniqa Group Austria Sh.A., z. Perparim Drini, kanë nënshkruar një Memorandum Bashkëpunimi, i cili ka për qëllim shkëmbimin e informacionit në mes të Agjencisë Kadastrale të Kosovës dhe Sigal Uniqa Group Austria Sh.A., duke siguruar një qasje më efikase dhe më të shpejtë në Regjistrin për të Drejtat e Pronës së Paluajtshme përmes ndërveprimit të shërbimeve digjitale.
Përmes këtij Memorandumi, palët kanë vendosur të krijojnë Procedura Standarde për ndërveprimin e shërbimeve digjitale të përcaktuara, duke mundësuar kështu që të dhënat e nevojshme për regjistrimin e hipotekave të merren dhe përpunohen në kohë reale, duke garantuar saktësinë dhe sigurinë e informacionit. Të dhënat që do të shfrytëzohen do të jenë të mbrojtura dhe konfidenciale, dhe do të përdoren vetëm nga personat e autorizuar për qëllime të këtij Memorandumi dhe për përmbushjen e obligimeve të përcaktuara nga legjislacioni në fuqi.