Pas vazhdimit të Projektit për Regjistrimin e Pronës së Paluajtshme në Kadastër dhe Infrastrukturës Gjeohapësinore (REGIP), u hap rruga për realizimin e suksesshëm të të gjitha aktiviteteve kyçe të projektit, përfshirë nënshkrimin e kontratave me Operatorët Ekonomikë për projektin e rëndësishëm të Rindërtimit të Kadastrit.
Nëpërmjet Rindërtimit të Kadastrit synohet që të azhurnohen të gjitha të dhënat mbi njësitë kadastrale dhe të drejtat pronësore, si dhe të bëhet harmonizimi i gjendjes në terren, me gjendjen në regjistrin kadastral. Për më shumë, Rindërtimi i Kadastrit si objektiv ka edhe ngritjen e vetëdijes kolektive për rëndësinë që ka regjistrimi i pronës në emër të pronarit faktik, të drejtën e grave në trashëgimi dhe regjistrimin e pronës në emër të dy bashkëshortëve.
Siç jemi zotuar, për herë të parë të gjithë Operatorët Ekonomikë janë vendorë, dhe me përkushtim të vazhdueshëm po arrihen avancime konkrete për një sistem kadastral më të saktë, më të sigurt dhe më efikas në Agjencinë Kadastrale të Kosovës. Implementimi i projekteve kapitale dhe realizimi i objektivave të AKK-së, do të vazhdojë të sjellë rezultate konkrete për qytetarët tanë dhe modernizimin e kadastrit.