Qeveria e Republikës së Kosovës, në mbledhjen e mbajtur më 13 mars 2025, ka miratuar Udhëzimin Administrativ 03/2025 për masat e veçanta për regjistrimin e pronës së paluajtshme të përbashkët në emër të të dy bashkëshortëve. Ky Udhëzim Administrativ tashmë është në fuqi dhe është publikuar në Gazetën Zyrtare më datë 17 mars 2025.
Ky Udhëzim Administrativ është produkt i bashkëpunimit të ndërsjellë mes Agjencisë Kadastrale të Kosovës, Agjencisë për Barazi Gjinore dhe palëve të tjera të interesit, me qëllim të avancimit të drejtave të grave në shfrytëzimin e të drejtave pronësore. Aktualisht, numri total i grave pronare të pronës së paluajtshme në Republikën e Kosovës është rreth 21%.
Megjithatë, që nga hyrja në fuqi e këtij Udhëzimi për herë të parë në vitin 2016, numri i grave pronare ka shënuar rritje të vazhdueshme, duke reflektuar përparimin në fuqizimin ekonomik dhe pronësor të grave në Kosovë. Miratimi dhe zbatimi i këtij Udhëzimi Administrativ përbën një hap të rëndësishëm në drejtim të barazisë gjinore dhe mbështetjes së grave për të realizuar të drejtat e tyre pronësore.

https://gzk.rks-gov.net/ActDocumentDetail.aspx?ActID=101967