Në ambientet e Agjencisë Kadastrale të Kosovës, u zhvillua një trajnim i veçantë dhe shumë i rëndësishëm për studentët e Fakultetit të Inxhinierisë së Ndërtimtarisë / Dega e Gjeodezisë. Ky aktivitet përfaqëson një hap të rëndësishëm drejt forcimit të bashkëpunimit ndërmjet akademisë dhe institucioneve shtetërore, duke kontribuar ndjeshëm në rritjen e kapaciteteve profesionale të studentëve dhe përgatitjen e tyre për tregun e punës.
Në hapje të trajnimit, Drejtori Ekzekutiv i AKK-së, z. Avni Ahmeti, përshëndeti studentët me një mirëseardhje të ngrohtë dhe frymëzuese, me ç’rast ndau me ta përvojën e tij si student, duke treguar për sfidat dhe avancimet e mëdha që kanë ndodhur ndër vite në fushën e teknologjisë dhe metodologjive të punës në përgjithësi.
Gjatë trajnimit, studentët u njohën nga afër me teknikat më të avancuara të fotogrametrisë, si dhe me mënyrat praktike të zbatimit të tyre në aktivitetet e përditshme të AKK-së, përmes një prezantimi gjithëpërfshirës nga z. Avni Rrustemi. PKy bashkëpunim mes universiteteve dhe institucioneve publike është dëshmi e përkushtimit të përbashkët për ndërtimin e një infrastrukture moderne dhe efikase të kadastrit në Kosovë.