Në një takim të frytshëm me Odën e Noterisë së Kosovës, në ambientet e Agjencisë Kadastrale të Kosovës, u diskutuan deri në imtësi dhe u elaboruan në çdo aspekt perspektivat dhe mundësitë për avancimin e bashkëpunimit në shkëmbimin e të dhënave në kohë reale ndërmjet zyrave noteriale dhe Zyrave Kadastrale Komunale.
Deri më tani, ky partneritet ka dëshmuar një harmonizim të shkëlqyer, ndërsa synimi i përbashkët është që bashkëpunimi i ndërsjellë të ngrihet në një nivel të ri të digjitalizimit dhe efikasitetit.
Së shpejti, zyret noteriale do të pajisen me mundësinë për të dorëzuar dosjet e plota – përfshirë aktet noteriale dhe dokumentacionin shoqërues – në formë digjitale drejt ZKK-ve, duke eliminuar kështu nevojën që palët të dorëzojnë fizikisht dokumentet në sportelet kadastrale.
Kjo qasje inovative do të përshpejtojë proceset, do të reduktojë barrën administrative për qytetarët dhe njëkohësisht do të garantojë integritetin dhe cilësinë e të dhënave të shkëmbyera.
Përmes këtij avancimi teknologjik, komunikimi ndërinstitucional do të ngrihet në një stad më të lartë, ndërkohë që procedurat e trajtimit të lëndëve do të jenë më të shpejta, më të sakta dhe më transparente.