Përfaqësues nga Agjencia Kadastrale e Kosovës (AKK), zhvilluan me sukses një trajnim profesional të specializuar në Cyrih, Zvicër. Ky trajnim, i organizuar nga ekspertë ndërkombëtarë të fushës, kishte për qëllim avancimin e njohurive dhe aftësive të stafit të AKK-së, në teknologjitë më të fundit të fotografimit ajror
Përmbajtja e trajnimit përfshinte:

• Planifikimin dhe matjen e pikave kontrolluese në terren (GCP);
• Orientimin, përpunimin dhe korrigjimin e imazheve ajrore;
• Prodhimin, përpunimin dhe kontrollin e cilësisë së ortoimazheve, si dhe krijimin e mozaikut përfundimtar;
• Gjenerimin e Modelit Digjital të Sipërfaqes (DSM) dhe krijimin e Modelit Digjital të Terrenit (DTM);
• Modelet tredimensionale (3D) të qyteteve – me fokus në aspektet teorike dhe praktike.

Ky trajnim përfaqëson një hap të rëndësishëm drejt modernizimit të kapaciteteve profesionale të AKK-së. Njohuritë dhe aftësitë e fituara do të kontribuojnë, njëherit forcojnë më tej rolin e AKK-së si institucion lider në fushën e kadastrit.
Iniciativat e tilla dëshmojnë përkushtimin e AKK-së për inovacion dhe profesionalizëm në shërbim të qytetarëve dhe zhvillimit të Republikës së Kosovës.