Në ambientet e Agjencisë Kadastrale të Kosovës, drejtori ekzekutiv z. Avni Ahmeti priti në takim zyrtar Kryeshefen Ekzekutive të Postës së Kosovës, znj. Nora Rraci, e cila qe e shoqëruar nga bashkëpunëtorë të saj.
Tema kryesore e takimit ishte nevoja emergjente për qasje në të dhënat e Regjistrit të Adresave, me qëllim të saktësimit, unifikimit dhe ndërlidhjes së të dhënave të adresave me sistemet postare të Postës së Kosovës.
Drejtori Ahmeti theksoi përkushtimin nga Agjencia Kadastrale e Kosovës për të bashkëpunuar ngushtë me Postën e Kosovës në këtë proces të rëndësishëm, duke potencuar:
• Ndërlidhjen e qytetarit me adresë zyrtare;
• Krijimin e aplikacionit mobil për adresa; si dhe
• Projekte të tjera që pritet të nisin së shpejti.
Një tjetër çështje me rëndësi që u diskutua ishte edhe unifikimi i emërtimeve të pronave të Postës së Kosovës, përmes një emërtimi të vetëm, unik dhe të saktë, që do të aplikohet në të gjitha pronat e kësaj ndërmarrjeje në të gjithë territorin e Republikës së Kosovës.
Nga ana e saj, znj. Rraci konfirmoi gatishmërinë për bashkëpunim të ndërsjellë, me qëllim të realizimit të përbashkët të objektivave dhe lehtësimit të shërbimeve për qytetarët.