Pas një pune dhe angazhimi disamujor të stafit nga Agjencia Kadastrale e Kosovës, në bashkëpunim me kompaninë zhvilluese, është vënë në funksion Sistemi i ri i Adresave të Republikës së Kosovës (ARIS).
Ky sistem është zhvilluar me teknologjinë më të fundit dhe me një infrastrukturë të përmirësuar, e cila ofron stabilitet, siguri, dhe performancë të lartë për të gjitha shërbimet e adresave.
Me mbi 100 përdorues aktivë, të cilët sigurojnë menaxhimin dhe mirëmbajtjen e vazhdueshme të këtyre të dhënave, ARIS-i aktualisht menaxhon:

• 23,594 rrugë (emra rrugësh)
• 561,874 pika të adresave
• 46,498 shenja të emrave të rrugëve

Ky hap përfaqëson një avancim të rëndësishëm të ndërmarrë së fundmi nga Agjencia Kadastrale e Kosovës në drejtim të modernizimit të sistemeve dhe shërbimeve, duke krijuar një platformë të besueshme për institucionet , në shërbim të qytetarëve .
ARIS-i është gjithashtu sistemi i parë që po implementohet në kuadër të projektit për Avancimin e Sistemeve Kadastrale, pjesë e të cilit janë edhe sisteme të tjera që pritet të publikohen së shpejti.