Ky reagim i Agjencisë Kadastrale të Kosovës vjen pas publikimit të njoftimit nga Oda e Inxhinierëve të Republikës së Kosovës lidhur me vendimin e marrë nga kjo odë sa i përket licencimit të gjeodetëve.
Për informim të OIRK-së dhe të opinionit të gjerë, me hyrjen në fuqi të Ligjit Nr. 08/L-237 për Kadastër të Pronës së Paluajtshme, përkatësisht dispozitave ligjore të nenit 10 dhe nenit 14, licencimi i gjeodetëve është kompetencë ekskluzive e Agjencisë Kadastrale të Kosovës. Sipas nenit 14, paragrafi 3, të Ligjit Nr. 08/L-237, përcaktohen qartë llojet e lejeve dhe licencave për gjeodetët në Republikën e Kosovës, duke përfshirë:
-lejet për kompanitë gjeodezike, si dhe
-licencat për gjeodetët individualë, përkatësisht për kryerjen e matjeve kadastrale dhe për kryerjen e matjeve gjeodezike.
Prandaj, AKK-ja ka kërkuar nga OIRK-ja që të rishqyrtojë vendimin e marrë për çështjen e licencimit të gjeodetëve, ngase kjo fushë është kompetencë ekskluzive e Agjencisë Kadastrale të Kosovës. Përfshirja e OIRK-së në këtë proces paraqet tejkalim të kompetencave të saj dhe shkelje të legjislacionit në fuqi.