Udhëhequr nga drejtori ekzekutiv z. Avni Ahmeti, dhe shoqëruar nga ekspertë të Agjencisë, Agjencia Kadastrale e Kosovës, po merr pjesë në konferencën prestigjioze të organizuar nga INTERGEO, njëherit panairin kryesor në fushën e gjeodezisë, gjeoinformacionit dhe menaxhimit tokësor, që po zhvillohet në Frankfurt, Gjermani.
INTERGEO përmbledh sektorët kryesorë të industrisë gjeohapësinore: gjeoinformacionin, matjet gjeodezike, sistemet GIS, sensorët satelitorë, teknologjitë e dronëve, smart city, mbrojtjen klimatike dhe zhvillimin urban të qëndrueshëm. Kjo platformë themelore shërben si arenë ndërkombëtare për dialog dhe promovim të zgjidhjeve ndaj sfidave globale si ndryshimet klimatike dhe urbanizimin e shpejtë.
Në këtë forum, përfaqësuesit e AKK-së zhvilluan biseda të frytshme me ekspertë të fushave përkatëse, duke shkëmbyer ide dhe praktika të avancuara, si dhe duke forcuar rrjetet profesionale. Këto përpjekje kontribuojnë në ngritjen e kapaciteteve teknike dhe strategjike të Kosovës në menaxhimin e hapësirës territoriale dhe zhvillimin e qëndrueshëm.
Pjesëmarrja në INTERGEO përbën një kontribut të rëndësishëm në avancimin e vizionit të AKK-së për një Kosovë gjithnjë e më të zhvilluar, një vendbanim të përmirësuar për brezat aktuale dhe ato që do vijnë. Rrjedhimisht, ky angazhim nënvizon përkushtimin e AKK-së ndaj inovacionit, transparencës dhe integritetit në menaxhimin kadastral, duke u bërë pjesë e proceseve globale që transformojnë mënyrën se si kuptojmë dhe ndërveprojmë me hapësirën tonë jetësore.