Udhëhequr nga Drejtori Ekzekutiv i Agjencisë Kadastrale të Kosovës (AKK), z. Avni Ahmeti, një delegacion i AKK-së zhvilloi një vizitë zyrtare në Komunën e Mitrovicës së Veriut, me qëllimin për të parë nga afër punimet që po realizohen në kuadër të renovimit të hapësirave të Zyrës Kadastrale në këtë komunë.
Delegacionit nga Agjencia Kadastrale e Kosovës i'u bashkëngjiten edhe Zëvendësdrejtoresha e Zyrës së Bankës Botërore në Prishtinë, znj. Jane Sprouster, si dhe Specialistja e Mjedisit, znj. Shpresa Kastrati, të cilat së bashku me përfaqësuesit e komunës vlerësuan ecurinë dhe cilësinë e punimeve që po realizohen në terren.
Të pranishmit u mirëpritën nga Kryetari i Komunës së Mitrovicës së Veriut, z. Erden Atiq, i cili shprehu mirënjohje të thellë ndaj Agjencisë Kadastrale të Kosovës dhe Bankës Botërore për mbështetjen dhe bashkëfinancimin e këtij projekti përmes Projektit REGIP. Kryetari Atiq theksoi se ky investim do të mundësojë krijimin e kushteve moderne të punës dhe përmirësimin e efikasitetit të shërbimeve ndaj qytetarëve.
Gjatë vizitës, delegacioni pati mundësinë të vëzhgojë nga afër progresin e arritur në implementimin e projektit, duke evidentuar standardet teknike dhe arkitektonike që po aplikohen për transformimin e plotë të hapësirave të Zyrës Kadastrale. Ky renovim pritet të kontribuojë në ngritjen e cilësisë së infrastrukturës institucionale dhe në përmirësimin e shërbimeve publike në fushën e kadastrit.
Në përmbyllje të vizitës, u nënvizua rëndësia strategjike e kohezionit ndërinstitucional dhe angazhimit të përbashkët në avancimin e projekteve që synojnë modernizimin, digjitalizimin dhe konsolidimin e sistemeve kadastrale në Republikën e Kosovës. U theksua se përmes këtyre nismave, forcohet efikasiteti administrativ dhe qeverisja e qëndrueshme e pronës, duke kontribuar drejtpërdrejt në zhvillimin e qëndrueshëm socio-ekonomik të vendit