Sot, Drejtori Ekzekutiv i Agjencisë Kadastrale të Kosovës, z. Avni Ahmeti, priti në takim delegacionin e Fondit Monetar Ndërkombëtar (FMN). Në përbërje të delegacionit ishin z. David Amaglobeli, Shef i Misionit të FMN-së për Kosovën, z. Phakawa Jeasakul, Senior Ekonomist në Departamentin Evropian, znj. Ana Lariau, Ekonomiste në të njëjtin departament, dhe z. Selim Thaçi, Senior Ekonomist në Zyrën e Përfaqësuesit Rezident në Kosovë.
Gjatë takimit, Drejtori Ahmeti i njoftoi për zhvillimet e fundit në Agjenci, me theks të veçantë në digjitalizimin e plotë të sistemeve dhe shërbimeve kadastrale. Ai bëri të ditur se këtë vit të gjitha shërbimet kadastrale do të jenë plotësisht të aksesueshme në formë digjitale, duke eliminuar nevojën e paraqitjes fizike të qytetarëve në sportele.
Gjithashtu, u bë e ditur se gjatë kësaj jave do të zhvillohen trajnime profesionale mbi avancimet dhe zhvillimet e reja të sistemeve kadastrale, ku do të marrin pjesë rreth 1,250 zyrtarë nga institucione të ndryshme. Po ashtu, u prezantua Gjeoportali i ri shtetëror, i cili përfshin funksione të reja dhe rrit ndjeshëm transparencën dhe qasjen e qytetarëve në të dhënat kadastrale.
Takimi u përmbyll me vlerësime pozitive për arritjet e deritanishme dhe me zotimin për vazhdimin e bashkëpunimit në drejtim të modernizimit të mëtejmë të sistemit kadastral në Kosovë.