Sot, delegacioni i Bankës Botërore, udhëhequr nga z. Caleb Travis Johnson, nisi një vizitë njëjavore në Kosovë dhe vizitoi Agjencinë Kadastrale të Kosovës (AKK) për të diskutuar ecurinë e Projektit për Regjistrimin e Pronës së Paluajtshme në Kadastër dhe Infrastruktura Gjeohapësinore (REGIP), një nismë kjo e financuar nga Banka Botërore për modernizimin e sistemit kadastral dhe gjeohapësinor në Republikën e Kosovës.
Në takim u trajtuan piketat kyçe të progresit për vitin 2025 dhe planifikimi i aktiviteteve për vitin 2026. Përfaqësuesit e Bankës Botërore dhe stafi i AKK-së shkëmbyen informacione të detajuara mbi arritjet, sfidat dhe masat që po ndërmerren për realizimin e objektivave të projektit. Ky dialog profesional shërbeu si një manifestim i sinergjisë midis palëve për të siguruar përmbushjen e rezultateve të pritura.
Drejtori i AKK-së, Avni Ahmeti, theksoi domosdoshmërinë e përmbylljes së aktiviteteve të parashikuara dhe konfirmoi angazhimin për finalizimin e tyre në përputhje me kontratën, njëashtu informoi të pranishmit për arritjet konkrete, përfshirë finalizimin e disa projekteve të rëndësishme, si dhe projektet tjera që aktualisht janë në fazën e implementimit.
Përfaqësuesit e Bankës Botërore shprehën përkushtimin e tyre për mbështetje të mëtejshme, ndërsa AKK konfirmoi gatishmërinë për të vijuar implementimin e aktiviteteteve sipas planit dinamik të paraparë. Kjo vizitë përbën një hap të rëndësishëm drejt konkretizimit të reformave kadastrale dhe forcimit të infrastrukturës gjeohapësinore në vendin tonë, një premisë e fuqishme për modernizimin e shërbimeve kadastrale.