21/01/2026
Në kuadër të finalizimit të procesit të digjitalizimit të sistemeve kadastrale, për tri ditë radhazi janë mbajtur trajnime me gjeodetë të licencuar dhe gjeodetët e kompanive të pajisura me leje.
Në këto trajnime kanë marrë pjesë gjithsej 180 pjesëmarrës, të cilëve u janë sqaruar në detaje procedurat, duke filluar nga parashtrimi i kërkesës nga pala e interesuar e deri te dërgimi i lëndës online në ZKK, e gjithë kjo në mënyrë plotësisht digjitale.
Me funksionalizimin e këtij procesi krijohen lehtësira të konsiderueshme për palët, pa pasur nevojë për paraqitje fizike në ZKK, duke mundësuar plotësimin e dokumentacionit në kohë reale përmes ngarkimit në sistem, aplikimin çdo ditë dhe në çdo orë, si dhe reduktimin e kopjeve fizike (duplikimeve) në ZKK dhe te gjeodetët.
Gjeodetët kanë treguar bashkëpunim të lartë dhe kanë shprehur falënderime për ofrimin e shërbimeve digjitale, në funksion të ngritjes së cilësisë së të dhënave.