Sot, në Agjencinë Kadastrale të Kosovës (AKK), qëndroi për vizitë Ministrja e Mjedisit, Planifikimit Hapësinor, znj. Fitore Pacolli-Dalipi, së bashku me bashkëpunëtorët e saj.
Ministrja u prit nga Ushtruesi i Detyrës së Drejtorit të Përgjithshëm të AKK-së, z. Faik Kelmendi, me ekipin e tij, i cili prezantoi të arriturat kryesore të institucionit, si dhe sfidat aktuale në përmbushjen e mandatit.
Gjatë takimit, theks i veçantë iu kushtua masave për përmirësimin e gjendjes së pronave, me fokus në forcimin e sigurisë juridike dhe garantimin e pacenueshmërisë së pronës. Njëkohësisht, u diskutua edhe për avancimin e sistemit të adresave, si element kyç për funksionalitetin institucional, shërbimet publike dhe shtrirjen e rendit dhe ligjit në të gjithë territorin e vendit.
Po ashtu, u trajtuan projektet aktuale të AKK-së dhe iniciativa të tjera zhvillimore, përfshirë proceset e digjitalizimit, rindërtimin e regjistrave kadastralë dhe ngritjen e kapaciteteve teknike dhe profesionale.
Ministrja Pacolli-Dalipi rikonfirmoi mbështetjen e plotë për AKK-në, duke theksuar rëndësinë e bashkëpunimit të ngushtë dhe përkrahjes së vazhdueshme në avancimin e politikave për menaxhimin e tokës dhe zhvillimin e qëndrueshëm në Republikën e Kosovës.