Drejtori i Përgjithshëm i Agjencisë Kadastrale të Kosovës, z. Faik Kelmendi, priti në takim përfaqësuesit e Shoqatës së Gjeodetëve të Kosovës, në një atmosferë të ngrohtë, kolegiale dhe profesionale.
Gjatë takimit u diskutua një gamë e gjerë temash me interes për profesionin e gjeodezisë dhe kadastrit, përfshirë edhe iniciativën për themelimin e Odes së Gjeodetëve të Kosovës. Me këtë rast, përfaqësuesit e ShGjK-së i uruan z. Kelmendi suksese në detyrën e tij të re në krye të Agjencisë Kadastrale të Kosovës.
Diskutimi ishte përmbajtësor dhe konstruktiv, ndërsa të dyja palët shprehën gatishmërinë për të thelluar bashkëpunimin e ndërsjellë në funksion të avancimit të çështjeve profesionale që lidhen me gjeodezinë, kadastrën dhe aspektet pronësore-juridike.
Agjencia Kadastrale e Kosovës mbetet e përkushtuar për bashkëpunim të ngushtë me komunitetin profesional, me synim zhvillimin dhe modernizimin e vazhdueshëm të kadastrit në Republikën e Kosovës.