Në zyrat e Agjencisë Kadastrale të Kosovës, me dy grupe të ndara komunash u mbajtën takimet informuese dhe koordinuese për Projektin e Kompletimit të Sistemit të Adresave në kuadër të projektit REGIP, konkretisht për përditësimin e të dhënave të adresave. Pjesë e takimit ishin drejtorët e urbanizmit dhe zyrtarët për adresa të 16 komunave të regjioneve të ndryshme të cilët nga zyrtarët e Njësisë së Adresave u informuan për rrjedhën e procesit të deritanishëm, planifikimet për fillimin e projektit dhe për përgjegjësitë e komunave dhe Stafit Mbështetës në këtë proces.

Me këtë rast komunave iu kërkua që të bëjnë përgatitjet e nevojshme në caktimin e personave për përcjelljen e këtij procesi, sigurimin e hapësirës dhe materialit të nevojshëm logjistik.

Projekti për Kompletimin e Sistemit të Adresave parasheh që komunave për gjashtë muaj të ju ofroj mbështetje në përditësimin dhe kompletimin e të dhënave të adresave, duke rekrutuar staf mbështetës për komuna, i cili do të mbledhë të dhëna të reja të adresave (rrugë e hyrje të reja dhe njësi), digjitalizimin dhe përditësimin e të dhënave në SIRA (Sistemi i Informacioneve për Regjistrin e Adresave), do të ofroj mbështetje në procesin e prodhimit dhe vendosjes së tabelave të emrave të rrugëve dhe numrave të hyrjeve për komuna si dhe ndërlidhjen e të dhënave të Adresave me të dhënat e Gjendjes Civile. Kjo parashihet të filloj nga muaji i ardhshëm, gjë që u mirëprit dhe përshëndet si proces i domosdoshëm dhe ndihmues për komunat.