Sot në ambientet e Agjencisë Kadastrale të Kosovës (AKK) është mbajtur takimi i grupit punues të Komitetit ndërministror për Administrimin e Tokës dhe Infrastrukturës Kombëtare të Informacioneve Hapësinore (IKIH).
Komiteti për Administrim të Tokës dhe IKIH ka rol të koordinimit dhe monitorimit të të gjitha iniciativave brenda fushës së administrimit të tokës dhe IKIH-së me qëllim të sigurimit dhe harmonizimit të politikave nacionale, lokale, publike dhe private, promovimit të çështjeve specifike për bashkë punim dhe partneritet publiko privat. Gjithashtu Komiteti ofron këshilla dhe bën propozimin e politikave të reja, autoriteteve përgjegjëse që kanë të bëjnë me administrimin e tokave dhe IKIH në Republikën e Kosovës;
Në këtë takim koordinues të udhëhequr nga AKK si sekretariat i këtij Komiteti, përveç aspektit organizativ të këtij grupi punues, u diskutuan dhe propozuan tema me interes shtetëror në fushën e Administrimit të Tokës dhe IKIH-së që duhet të përfshihen në agjendën e takimit të radhës të këtij Komiteti që pritet të mbahet në fillim të muajit qershor 2024.