Agjencia Kadastrale e Kosovës realizoi një takim me Agjencinë e Regjistrimit Civil për të diskutuar për intensifikimin e bashkëpunimit në prag të fillimit të projekteve të AKK-së për ndërlidhjen e qytetarit me adresë, rindërtimin e kadastrit dhe korrektimin e të dhënave të personave.
Për AKK-në e rëndësishme në këtë fazë është që nga ARC-ja të sigurohen informata sa i përket statusit jetësor të pronarëve të regjistruar në Regjistrin e të drejtave pronësore, kjo për nevoja të projekteve për të verifikuar numrin e trashëgimive që planifikohet të realizohen, nevojat e qytetarëve për trashëgimi, dhe detaje tjera të nevojshme për të arritur realizim sa më të mirë të projekteve.
Ofrimi i qasjes në Regjistrin e gjendjes civile edhe në projektin e ndërlidhjes së qytetarit me adresa është i domosdoshëm për realizim sa më efikas të tij. Ndërlidhja në kohë reale e sistemeve ndihmon, lehtëson dhe përshpejton mbledhjen e të dhënave dhe plotësimin e tyre në regjistra njëkohësisht duke minimizuar edhe mundësinë e gabimeve eventuale.
Agjencia e Regjistrimit Civil premtoi bashkëpunim të plotë me Agjencinë kadastrale të Kosovës, meqë qëllimi i përbashkët i të dyja institucioneve është ofrimi i  të dhënave sa më të plota dhe sa më të sakta për të gjithë qytetarët.