Të premten që e lamë pas, u përmbyll me sukses java e parë e vizitave të ekspertëve nga Agjencia Kadastrale e Kosovës (AKK), vizita këto që u zhvilluan në Zyrat Kadastrale Komunale, me qëllim të dorëzimit të raporteve mbi gjetjet e monitorimit të punëve dhe aktiviteteve të tyre.
Komunat që u vizituan gjatë kësaj faze të parë ishin: Vushtrria, Vitia, Shtimja, Novobërda, Ranillugu, Parteshi, Suhareka, Graçanica, Fushë Kosova, Juniku, Kllokoti, Obiliqi, Mitrovica, Hani i Elezit, Kaçaniku, Dragashi dhe Drenasi.
Kujtojmë që pas fuqizimit të legjislacionit të ri për kadastër dhe një sërë reformash të tjera në procedura dhe rrjedhë të punës, të cilat u ndërmorën vitin e kaluar nga AKK, ekspertët kanë filluar monitorimin e Zyrave Kadastrale Komunale dhe gjeodetëve/kompanive gjeodetike të licencuara që nga java e kaluar.
Vizitat do të vazhdojë edhe këtë javë në komunat e mbetura, me ç'rast ekspertët e AKK-së do të diskutojnë në detaje mbi të gjeturat e raportit paraprak të monitorimit, si dhe për aktivitetet që ndërlidhen me procesin e regjistrimit dhe vendosjen në lëndët përkatëse.
Ashtu siç ka ndodhur edhe më parë, pas përfundimit të vizitave në ZKK, do të përgatiten dhe dorëzohen raportet përkatëse të monitorimit tek Drejtori i ZKK-së dhe tek Kryetari i Komunës përkatëse, bashkë me të gjitha vërejtjet dhe rekomandimet për secilën nga to, si dhe për ndërmarrjen e veprimeve të mëtutjeshme në përputhje me legjislacionin në fuqi.