Agjencia Kadastrale e Kosovës zhvilloi një takim me përfaqësuesit e Shoqatës së Gjeodetëve të Kosovës, ku u trajtuan çështje me rëndësi strategjike për profesionin e gjeodezisë.
Diskutimet u fokusuan në njoftimin e fundit të Odës së Inxhinierëve të Kosovës, ku u ngritën shqetësime mbi implikimet juridike dhe detyrimin për përputhje të plotë me kornizën ligjore në fuqi.
Njëherit, u prezantua moduli i ri për gjeodetët, një mekanizëm që do të mundësojë administrimin dhe përpunimin e dokumentacionit teknik, që do të kontribuojë në rritjen e efikasitetit profesional, duke garantuar integritetin e të dhënave dhe qasjen më transparente në shërbim të publikut.
Në përmbyllje të takimit u dakordua për forcim të mëtutjeshëm të bashkëpunimit të ndërsjellë, me ç'rast u theksua se përmes një qasjeje koherente, koordinuese dhe ligjërisht të qëndrueshme mund të sigurohet avancimi i mëtejshëm i profesionit të gjeodezisë në vendin tonë.