Delegacioni i Bankës Botërore, nën drejtimin e z. Caleb Travis Johnson, ka nisur vizitën treditore në Kosovë, me ç'rast vizituan Agjencinë Kadastrale të Kosovës (AKK) për të parë nga afër e për të diskutuar në tërësi për ecurinë e Projektit për Regjistrimin e Pronës së Paluajtshme në Kadastër dhe Infrastrukturën Gjeohapësinore (REGIP).
Gjatë këtij takimi u konkretizuan prioritetet për 2025, u evidentuan sfidat kyçe dhe u riafirmua mbështetja e BB-së për përmbylljen e projektit në 2026. Drejtori Ekzekutiv i AKK-së, Avni Ahmeti, prezantoi të gjitha të arriturat dhe rezultatet duke përfshirë përmbylljen e 13 projekteve madhore dhe sukseset e vazhdueshme në iniciativat kyçe që po transformojnë kadastrin dhe qasjen e qytetarëve në shërbime moderne. Në veçanti, ai theksoi progresin domethënës të proceseve së projekteve në vijimësi, si Rindërtimi i Kadastrit, Zhvillimi i Gjeoportalit (NSDI dhe Gjeoportali Shtetëror), Ndërlidhja e Qytetarit me Adresë Zyrtare, Avancimi i Sistemeve Kadastrale, të cilat po ecin me ritme të qëndrueshme, duke gjeneruar rezultate të matshme dhe ndikim të prekshëm në terren.
Përfaqësuesit e Bankës Botërore vlerësuan ritmin dhe efektivitetin e implementimit, duke konfirmuar mbështetje të mëtejshme, ndërsa AKK rikonfirmoi përkushtimin për të çuar deri në fund këtë rrugëtim transformues. Vizita dëshmon suksesin e partneritetit strategjik AKK-BB, në konsolidimin e projekteve kadastrale dhe zhvillimin e infrastrukturës gjeohapësinore në Republikën e Kosovës.