Sot, në ambientet e Agjencisë Kadastrale të Kosovës, drejtori ekzekutiv, z. Avni Ahmeti, priti kryetarin e Odës së Noterisë së Kosovës, z. Shpend Haskaj. Edhe ky takim vjen në kuadër të intensitetit të shtuar të punës dhe angazhimit të javëve të fundit në përmbylljen e projektit Zhvillimi dhe Avancimi i Sistemeve të Informacioneve Kadastrale.
Gjatë këtij takimi, u zhvillua një diskutim për mundësitë dhe perspektivat për përforcimin e bashkëpunimit ndërinstitucional në shkëmbimin e të dhënave në kohë reale midis Zyrave Kadastrale Komunale (ZKK), dhe zyrave noteriale, përkatësisht azhurnimin e të dhënave të aktit noterial në Regjistrin e të Drejtave të Pronës së Paluajtshme (RDPP) nga vet noterët.
Ky bashkëpunim, i cili ka dëshmuar një harmonizim të suksesshëm deri më tani, synon të ngritet në një nivel të ri përmes digjitalizimit të proceseve dhe përmirësimit të efikasitetit institucional. Së shpejti, zyrat noteriale do të kenë mundësinë të dorëzojnë dosjet e plota, përfshirë aktet noteriale dhe dokumentacionin përcjellës, në formë digjitale direkt te ZKK-të, duke eliminuar nevojën për dorëzim fizik të dokumenteve në sportelet kadastrale.
Agjencia Kadastrale e Kosovës dhe Oda e Noterisë së Kosovës po vendosin themelet e një epoke të re të bashkëpunimit digjital, ku shërbimet publike bëhen më të lehta për qytetarët dhe administrata shtetërore më efikase në çdo hap të saj.