Me qëllim të diskutimit të çështjeve të ngritura javëve të fundit por edhe informimit për zhvillimet në AKK me datën 12.12.2023 është mbajtur një takim me përfaqësuesit e SHGJK-së.
Për hir të transparencës për të gjithë publikun e gjerë por edhe për komunitetin gjeodet në veçanti, AKK-ja ka ftuar në takim të gjithë këshillin drejtues të SHGJK-së.
Zv. Drejtori i përgjithshëm i AKK-së me bashkëpunëtorë në takimin e mbajtur dje me përfaqësues nga Shoqata e Gjeodetëve të Kosovës dhanë këto sqarime për të pranishmit:
• Kronologji të detajuar të punës që AKK-ja ka bërë për Projektligjin për kadastër,
• Votimin e draftit të parë të tij në Qeveri,
• Procesin e kalimit të Projektligjit në Komision Parlamentar,
• Pjesëmarrjen në grupet punuese të Kuvendit si dhe sqarimet e dhëna për Komisionin parlamentar,
• Kontributin e Shoqatës në këtë proces,
• Amandamentimet e AKK-së dhe SHGJK-së në Draftin final.
Agjencia Kadastrale e Kosovës në vazhdimësi ka përkrahur dhe ka inkurajuar gjeodetët që të japin kontributin e tyre në çështjet profesionale në të cilat është përgjegjëse AKK-ja, qoftë në përgatitjen e Kornizave të punës, qoftë në plotësim/ndryshim të Udhëzimeve administrative, rregullim/ndryshim të procedurave për ofrim të shërbimeve kadastrale, u ka ofruar qasje në sisteme kadastrale e sigurisht ka vlerësuar edhe kontributin e tyre për Ligjin e Kadastrit si një ndër ligjet bazike të kësaj fushe.
AKK-ja në punën e saj mbështetet në parimet si: paanshmëria, profesionalizimi dhe neutraliteti, prandaj një shkrim i tillë nuk qëndron dhe për më tepër ka për qëllim krijimin e opinioneve apo imazhit të ndryshëm nga ai që realisht e karakterizon Agjencinë Kadastrale të Kosovës, është tendencë për të dezinformuar opinionin e gjerë me shkrime të tilla të pavërteta, vetëm një ditë para votimit të ligjit në Kuvendin e Kosovës.
Andaj, bazuar në gjendjen faktike konsiderojmë se opinioni publik duhet të informohet drejt dhe korrekt, se nuk ka ndodhur asnjë refuzim i bashkëpunimit me SHGJK-në, asnjë shpërfillje e për më tepër AKK-ja edhe e ka ftuar SHGJK-në që të bashkëpunojë ngushtë për të gjitha aktivitetet që ndërlidhen me profesionistët e fushës.
AKK-ja shpreh gatishmërinë e saj të jap sqarime e përgjigjje edhe sot për secilin që ka paqartësi sa i përket Projektligjit për kadastër dhe cilitdo aktiviteti tjetër që është realizuar dhe po realizohet aktualisht nga Agjencia Kadastrale e Kosovës.