Drejtori Ekzekutiv i AKK-së z.Avni Ahmeti ishte për vizitë në Komunën e Vushtrrisë, ku u prit nga Kryetari i Komunës z.Ferit Idrizi. Arsyeja e takimit ishte përzgjedhja e Komunës së Vushtrrisë si pilot për fillimin e realizimit të projektit "Përmirësimi i të dhënave të personave në SIKTK". Kryetari Idrizi u informua në detaje për hapat dhe procedurën e realizimit të projektit e gjithashtu edhe benificionet e komunës dhe qytetarëve nga ai. Drejtori Ahmeti gjithashtu informoi të pranishmit edhe për projektet dhe aktivitet tjera të Agjencisë Kadastrale të Kosovës me fokus në projektet e Rindërtimit të kadastrit, projektet që ndërlidhen me Sistemin e adresave, Avancimet e sistemeve kadastrale, etj, për të cilat kërkoi bashkëpunimin dhe angazhimin maksimal edhe nga ana e nivelit lokal me qëllim të përfitimit sa më të madh të qytetarëve nga këto projekte.
Në anën tjetër edhe Kryetari Idrizi premtoi mbështetjen e tij dhe bashkëpunim në të gjitha aktivitetet e AKK-së që ndërlidhen me komunën që ai udhëheq për ngritjen e cilësisë së të dhënave kadastrale e gjithashtu edhe shërbimeve që u ofrohen qytetarëve dhe realizim sa më të sukseshëm të projekteve. Në fund të takimit Kryetari Idrizi ndau mirënjohje për Drejtorin Ahmeti për kontributin e dhënë për Komunën e Vushtrrisë.