Në kuadër të Aktivitetit për Qeverisje Pronësore, Agjencia Kadastrale të Kosovës në bashkëpunim me USAID-in kanë organizuar takimin e radhës së Komitetit të praktikave të mira me pjesëmarrës drejtorë e zyrtarë nga komunat e: Ferizajit, Lipjanit, Rahovecit, Obiliqit, Gjilanit, Vitisë, Fushë Kosovës, Graçanicës, Dragashit dhe Kaçanikut. Pjesëmarrës ishin edhe përfaqësues nga Agjencia për Barazi Gjinore dhe Zyra ligjore në Ministrinë e Drejtësisë.
Temë diskutimi ishin Udhëzimi Administrativ nr. 04/2024 për tarifat për produktet shërbimet kadastrale gjeodezike dhe regjistrimit të pronave dhe Udhëzuesi për matje, krijim, ndryshim dhe regjistrim të njësive kadastrale (parcelë, ndërtesë dhe pjesë të ndërtesës).
Gjithashtu dy nga ZKK-të pjesëmarrëse Gjilani dhe Rahoveci prezentuan punën e tyre rreth zbatimit të Planit për Përmirësimin e Shërbimeve Kadastrale si dhe adresimin e të gjeturave nga ky aktivitet.
Zv. Drejtori ekzekutiv i AKK-së z. Avni Ahmeti informoi të pranishmit edhe për disa nga aktivitetet kryesore të AKK-së në këtë periudhë kohore, e gjithashtu edhe falenderoi USAID-in për kontributin dhe ndihmën që po ofron në kuadër të projektit në identifikimin e mundësive për ndryshime në ofrimin e shërbimeve më të mira për qytetarët nga ana e ZKK-ve.
Në anën tjetër Ramadan Klisurica, Drejtor i Aktivitetit të USAID-it Qeverisja e Pronës tha mes tjerash që ka edhe aktivitete të tjera nga USAID për këtë peridhë kohore, ku përveç aktiviteteve me komunat partnere të aktivitetit do të realizoj trajnime për zyrtarët e komunave për përgatitje/standardizim të të dhënave për publikim në Gjeoportalin shtetëror. Gjithashtu trajnime në këtë periudhë USAID-i do të mbajë edhe për Noterët e rinj të cilët sapo janë emëruar.
Kujtojmë që Komiteti i Praktikave të Mira (KPM) shërben si një forum këshillues ndërinstitucional, për shkëmbimin e përvojave, praktikave më të mira dhe mësimeve të nxjerra ndërmjet institucioneve të nivelit lokal dhe qëndror, që kanë një rol të drejtpërdrejtë në qeverisjen dhe mirëmbajtjen e Regjistrit të të Drejtave Pronësore në Kosovë. Nga këto takime synohet që të definohen hapat që duhet të ndërmarrë secila ZKK në drejtim të ngritjes së cilësisë së shërbimeve kadastrale.