Sot, në zyret e Agjencisë Kadastrale të Kosovës, u mbajt një takim i frytshëm me përfaqësues të Komunave dhe Operatorëve Ekonomikë, me qëllim të koordinimit të zbatimit të projektit të rëndësishëm: “Rindërtimi i Kadastrit në 115 Zona Kadastrale”.
Gjatë këtij takimi, Drejtori Ekzekutiv i Agjencisë Kadastrale të Kosovës, z. Avni Ahmeti, i informoi të pranishmit për planin dinamik të implementimit të projektit, duke theksuar rëndësinë e bashkëpunimit ndërinstitucional dhe përgatitjeve për një fushatë gjithëpërfshirëse informimi që nis javën e ardhshme.
Fushata e informimit synon të njoftojë qytetarët për procesin e rindërtimit të kadastrit, rëndësinë e regjistrimit të pronës në emër të pronarit faktik, promovimin e të drejtës së grave në trashëgimi dhe regjistrimin e përbashkët të pasurisë për bashkëshortët.
Ky takim shënon një hap konkret drejt përgatitjes së terrenit për punën voluminoze që pritet të zhvillohet, ku suksesi i këtij projekti do të shërbejë si themel për rindërtimin e tërësishëm të të dhënave kadastrale në 1305 Zona Kadastrale në gjithë territorin e Republikës së Kosovës.
Me përkushtim, bashkëpunim dhe transparencë, Agjencia Kadastrale e Kosovës vazhdon të ndërtojë një sistem modern, të saktë dhe të qasshëm për të gjithë qytetarët.