Sot në Vushtrri, drejtori ekzekutiv i Agjencisë Kadastrale të Kosovës, z. Avni Ahmeti, së bashku me Kryetarin e Komunës, z. Ferit Idrizi dhe ekipin e AKK-së, zhvilluan një takim përmbajtjesor me banorët e kësaj komune. Në këtë ngjarje u prezantuan në detaje fazat e zbatimit të projektit, si dhe përfitimet konkrete që ky projekt sjell për të gjithë qytetarët.
Gjatë diskutimeve të hapura dhe interaktive, qytetarët u informuan për mënyrat sesi ky projekt adreson sfidat e kahershme të pronësisë – duke ofruar zgjidhje reale për ngërçet dokumentare e ligjore që qytetarët kanë trashëguar brez pas brezi.
Projekti i Rindërtimit të Kadastrit synon që të krijojë një sistem të besueshëm, të lehtë dhe falas për të gjithë, duke mundësuar që çdo qytetar të ketë qasje të barabartë në të drejtat e tij pronësore dhe të ndërtojë mbi to një të ardhme më të sigurt e më të qëndrueshme.
Mos qëndroni pasiv – bëhuni pjesë aktive e këtij procesi transformues dhe sillni qartësi dhe siguri në të drejtën tuaj mbi pronën!