Pas disa vitesh pune dhe një përkushtimi të vazhdueshëm, mes shumë sfidash, Agjencia Kadastrale e Kosovës në bashkëpunim me komunat, ka arritur me sukses që për herë të parë në Republikën e Kosovës, të gjitha komunat t’i kenë emërtuar rrugët sipas ligjeve në fuqi.
Me insistimin dhe mbështetjen e këtij institucioni, edhe komunat si Novobërdë, Mitrovicë e Veriut, Leposaviq, Zveçan dhe Zubin Potok kanë përmbyllur këtë proces të rëndësishëm, i cili shënon kompletimin e sistemit të adresave në të gjithë vendin, mes tjerash, duke përmirësuar dukshëm qasjen e qytetarëve ndaj shërbimeve publike, lokalizimin e adresave dhe sistemet e navigimit.
Digjitalizimi i emërtimeve të rrugëve në Sistemin e Adresave (ARIS) tashmë ka përfunduar, ndërsa në proces janë edhe digjitalizimi i shenjave dhe i numrave të objekteve, duke sjellë rrjedhimisht standarde më moderne dhe më të qëndrueshme për të gjithë qytetarët.
Kjo është një arritje historike për Kosovën: një hap drejt një sistemi adresash të organizuar dhe funksional për të gjithë qytetarët; njëkohësisht, vendi plotëson një nga parakushtet për integrim evropian.
Agjencia Kadastrale e Kosovës mbetet e përkushtuar në realizimin e projekteve tejet të rëndësishme, me fokus në avancim, digjitalizim dhe ofrimin e shërbimeve sa më cilësore për të gjithë qytetarët.