Sot, në Agjencinë Kadastrale të Kosovës, qëndroi për vizitë një delegacion nga Universiteti i Prishtinës, i kryesuar nga Prof. Arben Hajrullahu.
Delegacioni i Universitetit të Prishtinës u prit nga U.d. Drejtori i Përgjithshëm i Agjencisë Kadastrale të Kosovës, z. Faik Kelmendi, së bashku me bashkëpunëtorët e tij.
Qëllimi i takimit ishte nënshkrimi i një memorandumi bashkëpunimi ndërmjet Agjencisë Kadastrale të Kosovës dhe Universitetit të Prishtinës, me interes të ndërsjellë për të dy institucionet.
Ky memorandum parasheh mbështetjen e AKK-së me ekspertizën ekzistuese në institutet e ndryshme të Universitetit të Prishtinës, sipas nevojave profesionale të Agjencisë. Po ashtu, memorandumi krijon mundësi për studentët që të zhvillojnë praktikë profesionale, si dhe për shfrytëzimin e hapësirave dhe kapaciteteve për punë kërkimore-shkencore.
Gjithashtu, AKK u zotua ta mbështesë Universitetin e Prishtinës në trajtimin dhe zgjidhjen e çështjeve pronësore me të cilat UP është përballur kohëve të fundit, përfshirë raste të pretenduara të uzurpimeve dhe tjetërsimeve të pronave nga individë dhe institucione të ndryshme.
Gjatë takimit u diskutuan tema të rëndësishme profesionale, si dhe mundësitë për thellimin e bashkëpunimit ndërinstitucional ndërmjet AKK-së dhe UP-së.