Adresat zyrtare dhe kodet postare të Kosovës tashmë kanë marrë aprovimin zyrtar nga Google dhe brenda pak javëve do të jenë të disponueshme për të gjithë. Ky është një hap tejet i rëndësishëm për lehtësimin e qasjes në shërbime publike, biznesore dhe private, duke garantuar një sistem më të saktë, më të besueshëm dhe më funksional të adresave.
Agjencia Kadastrale e Kosovës, në kuadër të angazhimit për finalizimin e Sistemit të Adresave Zyrtare, ka punuar intensivisht që të dhënat e adresave zyrtare të jenë të qasshme nga të gjithë. Si pjesë kyçe e këtij procesi ka qenë bashkëpunimi me Google Maps, duke synuar përfshirjen e adresave të sakta në platformën më të përdorur të navigimit në botë.
Adresat zyrtare në Google Maps do të lehtësojne në masë të madhe procesin e ndërlidhjes së qytetarit me adresë zyrtare, duke i informuar saktë qytetarët për adresat e tyre, njëherit duke eliminuar pasaktësitë dhe duke e bërë më të lehtë lokalizimin e çdo vendndodhjeje në Republikën e Kosovës.