Në fjalën e tij hyrëse, Drejtori Ekzekutiv i AKK-së, Avni Ahmeti, u uroi mirëseardhje të gjithë të pranishmëve, duke nënvizuar rëndësinë e Komitetit dhe takimeve të rregullta vjetore me bashkëpunëtorë e akterë kyç, rrjedhimisht takimeve më të rëndësishme për Administrimin e Tokës dhe Informacioneve Gjeohapësinore në Republikën e Kosovës.
Në përputhje me Ligjin Nr. 08/L-010 për krijimin e IKIH, jemi të angazhuar maksimalisht, për të implementuar një infrastrukturë moderne të administrimit të tokës, duke ndjekur praktikat më të mira të Bashkimit Evropian. Si AKK, vetëm për këtë vit kemi realizuar një sërë numër të projekteve dhe reformave legjislative. Është thelbësore tani që të shqyrtojmë ndryshimet në Ligjin për Administrimin e Pushtetit Lokal, për të siguruar funksionalizimin e plotë të ligjit të ri për kadastër, përkitazi organizimin vertikal.
Drejtori Ahmeti theksoi se, pas takimit të mëhershëm të mbajtur, tashmë kemi arritur që t'a miratojmë udhëzimin e fundit administrativ të ligjit për kadastrën, i cili njëherit përfshin:

-  Unifikimin e tarifave për të gjitha shërbimet kadastrale;
-  Lirimin e tarifave për shërbimet dhe produktet kadastrale, si dhe
-  Hapjen e rrugës për ofrimin e të gjitha produkteve në mënyrë digjitale.

Duke falënderuar institucionet si ARC dhe ASHI ër bashkëpunimin e ndërsjellë me Agjencinë Kadastrale të Kosovës, kemi realizuar me sukses projekte të rëndësishme kapitale si:

-  Ofrimi i Certifikatës pa pagesë në E-Kosova;
-  Nderlidhja e qytetarëve me adresë;
-  Rindërtimi në 115 zk.

Gjithashtu, kemi organizuar takime të rëndësishme me kryetarët e komunave, ku kemi paraqitur të gjitha të arriturat e AKK-së, dhe kemi diskutuar deri në hollësi, për sfidat e përbashkëta dhe koordinimin e ndërsjellë për punët e rradhës.
Drejtori Ahmeti, shtoi për më shumë se deri në fund të vitit do të ketë zhvillime të tjera të rëndësishme që ndërlidhen edhe me institucione të tjera të RKS, si:

-  Përfundimi i projektit për aerofotografimin e territorit të Kosovës,
-  Vendosja e numrave dhe emërtimeve në të gjitha komunat,
-  Rrjeti i nivelimit,
-  Digjitalizimi i procesit të licencimit të gjeodetëve, si dhe
-  Publikimi i të dhënave për pronarët në Gjeoportal.

Ndërsa në fjalën e tij, zv. Ministri i MMPHI-së, Jeton Raka, mes tjerash shprehu:
"Për të rritur nivelin e shërbimeve kadastrale, në fund të vitit të kaluar është miratuar Ligji për Kadastër së Pronës së Paluajtshme. Ky ligj përbën një hap të rëndësishëm në organizimin e proceseve, dhe tani është thelbësore të shqyrtojmë kërkesat për plotësimin dhe ndryshimin e Ligjit për Administrimin e Pushtetit Lokal, për ta funksionalizuar plotësisht Ligjin e ri të Kadastrit.
Përveç miratimit të Ligjit për Infrastrukturën Kombëtare të Informacionit Hapësinor, në mbledhjen e fundit të Qeverisë miratuam Strategjinë për Infrastrukturën Kombëtare të Informacioneve Hapësinore (2024-2028), si dhe Planin e Veprimit (2024-2026), të cilat synojnë të ofrojnë informacion hapësinor efikas për qytetarët. Ky informacion, në përputhje me të dhëna të tjera relevante, do të shërbejë për ofrimin e shërbimeve emergjente në kohën dhe në vendin e duhur, për identifikimin e vendndodhjeve të shërbimeve lokale, për shmangien e bllokimeve në trafik dhe do të kontribuojë në menaxhim më të mirë të jetës në përgjithësi, duke siguruar qasje më të gjerë në informacione."
Si përfundim, u theksua mbështetja e fuqishme nga organizatat ndërkombëtare, të cilat drejtori Ahmeti i falënderoi sinqerisht për përkrahjen e tyre të vazhdueshme dhe prezencën në këtë takim të rëndësishëm. Koordinimi i ngushtë me organizatat ndërkombëtare dhe institucionet vendore, është një faktor kyç, roli dhe angazhimi i së cilave, janë të një rëndësije të veçantë për arritjen e objektivave të përgjithshme, marrë parasysh profesionalizmin dhe përvojën e ekspertëve, si ndërkombëtarë ashtu edhe vendorë.
Më tej gjtatë diskutimeve të gjera të sesionit të sotshëm, u zhvilluan diskutime të ndryshme prej zyrtarë të AKK-së, përfaqësues të Bankës Botërore, USAID, GIZ, OSBE, UN Habitat, e Dutch Kadaster. Po ashtu, u prezantuan tema si: "Sistemi i Adresave dhe Ndërlidhja e Qytetarit me Adresë", "Praktikat e Konsolidimit të Tokës Bujqësore", "Metodat Inovative për të dhëna koherente", si dhe "Qeverisja e Pronës", ku u paraqitën ide dhe rekomandime të vlefshme që do të udhëheqin edhe aktivitetet e ardhshme.
Procesverbali i mbledhjes së kaluar u miratua unanimisht, dhe u dakordua bashkarisht për mbledhjen e ardhshme të Komitetit, që do të mbahet në Mars të 2025, me bindjen për rezultate akoma më të mira dhe një angazhim të vazhdueshëm në avancimin e mëtutjeshëm dhe realizimin e objektivave të Agjencisë Kadastrale të Kosovës.