Pas fuqizimit të legjislacionit të ri për kadastër dhe një varg reformash tjera në procedura e rrjedhë të punës, që janë ndërrmarrë vitin e kaluar nga Agjencia Kadastrale e Kosovës, ekspertë nga AKK kanë filluar monitorimin e Zyreve Kadastrale Komunale dhe gjeodetëve/kompanive gjeodete të licencuara, për të verifikuar nga afër punën e tyre.
AKK, tashmë ka formuar katër grupe monitoruese për lëndët juridike dhe teknike, dhe prej sot kanë filluar vizitat e para nëpër Komuna. Komunat e para që u vizituan sot ishin Vushtrria dhe Juniku, ku u mirëpritën ekspertët e AKK-së dhe u diskutua në detaje mbi të gjeturat e raportit paraprak të monitorimit, e po ashtu edhe për aktivitetet që ndërlidhen me procesin e regjistrimit dhe vendosjes në lëndët përkatëse.
Ashtu siç ka ndodhur edhe më herët në secilën fazë të monitorimit pas përfundimit të vizitave në ZKK, do të përgatiten dhe dorëzohen raportet përkatëse të monitorimit tek drejtori i ZKK-së dhe tek kryetari i komunës, bashkë me të gjitha vërejtjet dhe rekomandimet për secilën nga to.