Në vazhdën e ndërtimit të Infrastrukturës Kombëtare të Informacionit Hapësinor (IKIH) në Republikën e Kosovës, në përputhshmëri me Direktivën INSPIRE, Strategjia për Infrastrukturën Kombëtare të Informacionit Hapësinor dhe Plani i Veprimit synojnë që të ofrojnë informacion hapësinor efektiv për qytetarët. Ky informacion, i kombinuar me të dhëna të tjera relevante, do të shërbejë për qëllimin e ofrimit të shërbimeve të shpejta emergjente në vendin e duhur, për identifikimin e vendndodhjeve të shërbimeve lokale, për shmangien e bllokimeve në trafik dhe njëherit do të kontribuojë në menaxhim më të mirë të jetës në përgjithësi, duke siguruar qasje më të gjerë në informacione.
Ky dokument strategjik i referohet praktikave të shteteve të Bashkimit Evropian në drejtim të përmbushjes së detyrimeve në procesin e integrimeve evropiane të vendit. Njëherit, kjo direktivë përshkruan bashkëpunimin dhe zgjidhjet kolektive për shërbimet digjitale dhe shkëmbimin e të dhënave. Digjitalizimi në rritje në fusha të ndryshme sjell perspektiva të reja për mbledhjen, analizimin dhe krijimin e njohurive – si dhe inkurajimin e shkëmbimit të informacionit, bashkëpunimit dhe angazhimit ndërmjet palëve të interesit.