Në një takim informues Drejtori Ekzekutiv i Agjencisë Kadastrale të Kosovës, z. Avni Ahmeti, u prit nga Kryetarja e Komunës së Ranillugut, znj. Tanja Antiq.

Drejtori Ahmeti e informoi Kryetaren Antiq për përfitimet e qytetarëve të kësaj komune të vogël nga njëri prej projekteve më të rëndësishme që po zhvillon aktualisht Agjencia Kadastrale e Kosovës, Rindërtimin e Kadastrit. Ky projekt synon adresimin e mospërputhjeve mes gjendjes faktike në terren dhe të dhënave të evidentuara në Regjistrin e të Drejtave mbi Pronat e Paluajtshme, përfshirë zyrtarizimin e transaksioneve joformale, regjistrimin e trashëgimive, etj.

Projekti parasheh rindërtimin dhe përditësimin e informacioneve kadastrale, në dy zona kadastrale të Ranillugut: Zk. Kërmjan i Poshtëm dhe Domoroc.

Mes tjerash u diskutua edhe për zhvillimet e fundit në AKK me fokus digjitalizimin e shërbimeve kadastrale, si dhe nga ana tjetër për sfidat me të cilat përballet kjo ZKK.